Siglir tar il cuntegn
Inhalt

Surselva Il club Buna Vista Golf a Sagogn dovra novs commembers

Cun acziuns spezialas speran ils responsabels da chattar almain 100 novs commembers. Els dovran quels per segirar il futur dal club da golf.

La chasa dal club da golf sa chatta gest a l’entrada da Sagogn.
Legenda: La chasa dal club da golf sa chatta gest a l’entrada da Sagogn. RTR, C. Albin

L' emprima acziun, in curs da basa gratuit e commembranza libra enfin la fin da l’onn, n’ha betg gì success. Mo 15 enfin 20 vegn persunas han nizzegià l’acziun e fatg il curs. Planisadas sajan anc ulteriuras acziuns, detagls da quellas acziuns na sajan dentant anc betg sin maisa. Actual dumbra il club da golf rodund 330 commembers activs, 60 juniors e 50 commembers passivs.

Investiziuns da 200’000 enfin 300’000 francs per onn

Ina part da la plazza da golf a Sagogn. Davos la baselgia catolica da Sagogn.
Legenda: Ina part da la plazza da golf a Sagogn. Davos la baselgia catolica da Sagogn. RTR, C. Albin

Tenor il quint dal president dal club da golf, Leo Cathomas, dovrian els dentant 100 commembers dapli per savair finanziar las investiziuns che spetgan el futur. La proxima gronda investiziun saja il remplazzament dal parc da maschinas cun ina valita da 1,2 milliuns francs en 5 fin 7 onns. Per savair finanziar quella investiziun, stoppia il club metter dal maun mintga onn tranter 200’000 enfin 300’000 francs. Ils davos onns na saja quai dentant betg stà pussaivel, di Leo Cathomas. Las entradas hajan gist cuvert las expensas. Cun dapli commembers fiss quai dentant pussibel da far.

Il luvratori dal club da golf.
Legenda: Il luvratori dal club da golf. RTR, C. Albin

Daners era ord las taxas da turissem

Sper novas entradas cun dapli commembers, spera Leo Cathomas, ch’il club sappia era profitar da las taxas da turissem. L’entira plazza da golf, la chasa dal club cun il secretariat ed in restaurant ed il luvratori hajan ina valita da rodund 17 milliuns francs.

Bajegià saja tut quai vegnì senza l’agid dal maun public. La plazza da golf saja ina chomma per il turissem regiunal e quai giustifitgeschi in sustegn cun daners da las taxas da turissem.