Il chamutsch alv vegn en il Museum da la natira

Il chamutsch alv sajettà avant curt d'in chatschader da Glion vegn exponì en il Museum da la natira dal Grischun a Cuira. Tenor indicaziuns dals responsabels hajan els cumprà il chamutsch alv.

Il chamutsch alv e dasperas in chamutsch normal ch'è prest nair.

Legenda da maletgs: Durant l'enviern è il chamutsch alv anc bler pli alv. mad

Il giuven chatschader da 20 onns Mathis Schnider da Glion ha sajettà ina chaura chamutsch alva. La chaura chamutsch era enconuschenta a blers chatschaders sursilvans. Sco igl è stà d'udir avessan era auters pudì sajettar quella chaura. Ma nagin ha vairamain gughegià da far quai fin ussa. La raschun è fitg simpla: Ils chamutschs alvs èn fitg rars ed i portia discletg da sajettar in tal. Il Museum da la natira Grischun ha uss confermà ch'els hajan cumprà l'animal e ch'els veglian en futur exponer il chamutsch alv.

La decisiun

Mathis Schnider n’aveva mai udì da quai – pir suenter ha el intervegnì ch’ì vegnia ditg che quai pudessi purtar discletg. El saja però betg superstizius, ha el ditg.

El enconuschevia questa chaura chamutsch gia dapi in pèr onns, ma avant ch’el haja sajettà la chaura haja el studegià in mument e la finala prendì la decisiun: «Uss u mai pli!»

Albino u betg

Tenor il biolog Hannes Jenny haja in chamutsch alv ina particularitad genetica (da far nagut cun albinissem). Il melanin che procura per la colur stgira dal pail è pli flaivel. Ord quest motiv è quest chamutsch quasi alv l'enviern e fitg cler la stad. En il Grischun èn enconuschent singuls chamutschs alvs en la Val Medel, al Calanda ed en Lumnezia.