Gia segir è che la Migros daventa la locataria principala. Sper la Migros vegn era la posta a prender domicil en il nov «Center Marcau». Tge ulteriuras stizuns che vegnan en quest bajetg, n'è betg anc cler. Sper la part economica datti era anc 31 abitaziuns en quella surbajegiada.
Speranza senza recurs
L’idea da construir in bajetg d'economia e per abitar amez la cità da Glion è naschida l'onn 2008. L’entschatta da las lavurs da construcziun dal bajetg che la Rhomberg Bau SA ha sviluppà ensemen cun Capaul & Blumenthal Architects ETH BSA e la Berninvest SA, savess succeder l’entschatta da l'onn proxim. La dumonda da construcziun ha igl investider, il fond immobigliar Immo Helvetic, inoltrà l’emna vargada.
Gordian Blumenthal na quinta betg cun impediments da las instanzas da la vischnanca da Glion, che pudessan retardar il project. La collavuraziun cun las autoritads saja numnadamain stada fitg stretga durant il temps da svilup. «Sch’i dat dentant anc recurs da privats, n'è betg calculabel», manegia Blumenthal.
Sch’i na dat nagins recurs, quintan els da pudair entschaiver a bajegiar la primavaira 2016. Ils architects quintan cun rodund trais onns temp da bajegiar.