Siglir tar il cuntegn
Inhalt

Surselva Igl è da nizzegiar mintga minuta per far naiv

La fin da november eran las relaziuns per ennevar «superexcellentas», - 10° ed avunda aua. Lura hajan els pudì far naiv artifiziala enturn il Crap sogn Gion e sin la vart da Flem. Quai di Balzer Arpagaus, il schef d'ennevar ed il provediment d'aua da l'Arena Alva. I saja da nizzegiar mintga minuta.

Actualmain è la situaziun puspè uschia che las temperaturas na laschan betg tiers ina gronda producziun da naiv artifiziala. Sulet durant la notg possian els laschar ir ils chanuns da naiv. Ils ultims 10 - 15 onns saja la situaziun da far naiv artifiziala sa midada fitg, di Balzer Arpagaus.

Las temperaturas sajan memia autas ed era ils pli novs canuns e las pli novas maschinas da far naiv basignan temperaturas d'almain minus 2 grads.

Lai artifizial memia pitschen

Sper las temperaturas è er la quantitad d'aua che stat a disposiziun impurtanta per ennevar. Sin la vart da Flem hajan els il lai artifizial Nagens cun 200'000 meters cubics aua. Il lai artifizial sut il Crap sogn Gion haja sulet ina quantitad da 60'000 meters cubic. Quest lai è svidà entaifer paucs dis. La fin da november, cura che las relaziuns per ennevar eran bunas hajan els svidà l'entir lai, di Arpagaus. Els hajan lura puspè emplenì il lai, ma cura che l'aua fiss stada a disposiziun, n'eran las temperaturas betg pli optimalas.

Il mument haja num spetgar ed avair pazienzia. Els fetschian il meglier ord la situaziun, di Balzer Arpagaus. Enfin oz hajan els anc mintg'onn chattà ina schliaziun.

L'Arena Alva en cifras

  • 120 km pistas da 10 - 50 m ladezza
  • 40 km pista pon vegnir ennevadas,
  • 380 canuns da naiv
  • 500'000 m³ aua per ennevar quests 40 km pista,
  • 100'000 m³ aua per ennevar la megapipa e mesapipa, il snowparc, sigls etc.