Siglir tar il cuntegn

Header

Navigaziun

Legenda: Guardar il video In schatg ord in’emprova dal Chor d’affons Surselva. Durada 02:13 minutas.
Or da RTR dals 03.05.2016.
cuntegn

Surselva Ideas per preschentaziun da giubileum vegnan dals uffants

Per il giubileum da 10 onns dal Chor d’affons Surselva preschenta quel l’ovra «Digl affon che viva sin ina plonta».

Naschì è l’idea per il project entras discurs e muments che la dirigenta Rilana Cadruvi ha passentà cun ils uffants durant emprovas e concerts.

Ils uffants raquintian da lur siemis, temas e bler auter, di Rilana Cadruvi. «En quests 10 onns hai dà bleras da questas episodas ed jau hai pensà, forsa fiss quai da far insatge cun ils uffants per ils uffants.» Uschia ha Rilana Cadruvi contactà il cumponist Flavio Bundi ed il teatrist Roman Weishaupt. Els han s’entupads pliras giadas cun ils uffants.

Cun far gieus e scenas han els pudì rimnar patratgs, siemis ed ideas dals uffants. Quellas èn lura vegnidas messas en texts da Roman Weishaupt. Flavio Bundi ha lura cumponi latiers las chanzuns.

L’uffant che viveva sin ina planta

Ord quai è sa dà l’istorgia dad in uffant che viveva sin ina planta. L’uffant ha pers sia famiglia entras in accident ed era persul en in guaud. Sco quai che Rilana Cadruvi di, raquintian las chanzuns e las scenas tranteren, co l’uffant ha stuì emprender dad ir enturn cun la situaziun dal esser persul e cun sias temas. L’uffant entaupia adina puspè creatiras ed el haja era in grond siemi – pudair sgular.

«In siemi che va en vigur»

Per Rilana Cadruvi che dirigia dapi 10 onns il chor è il project insatge tut spezial: «Quai è per mai in grond siemi che va en vigur.» Da l’autra vart gidia l’ovra era ad augmentar il dumber da litteratura rumantscha per chors d’uffants. Sco Rilana Cadruvi di, na dettia quai betg uschè blera.

Era suenter 10 onns n’è Rilana Cadruvi betg unfisa da diriger il Chor d’affons Surselva: «Ord uschia in grond project naschan adina novas ideas. Jau hai bleras da questas en mes truclet ed jau ma legra gia sin il proxim onn da chant.»

Il project

Per la realisaziun quintan ils organisaturs cun custs da var 80’000 francs. Els èn dentant leds d'avair pudì engaschar persunas professiunalas da la regiun per la realisaziun e natiralmain blers voluntaris.

Preschentaziuns

  • venderdi, 6.5.2016, 20:00
  • sonda, 7.5.2016, 20:00
  • dumengia, 8.5.2016, 17:00

Reservaziuns pon ins far qua.