La societad americana Z Capital Partners vul manar vinavant il hotel da tradiziun e far londeror in hotel da luxus da 5 stailas uschia che l’hotel haja puspè ina posiziun dominanta en il martgà svizzer d’hotels. Quai ha la societad declerà. Per far quai vegnia investì en las chombras d’hotel, dentant era en l’infrastructura da wellness.
Quella purschida duai anc vegnir augmentada cun ina purschida da wellness medicinal. Sco quai ch’igl è vegnì infurmà las medias vegni investì persuenter tranter 5 e 10 milliuns francs. Il persunal sco era il directur Daniel Füglister pon restar per il mument vinavant en il hotel.
Sco quai ch’il CEO da Z Capital, James Zenni di, haja la societad grond plaschair da pudair acquistar l’hotel istoric a Flem. L’immobiglia saja fitg adattada per il portfolio da Z Capital Partners. La Z Capital Partners è ina societad da finanzas ch’administrescha 2,3 milliardas dollars americans ed ha biros a New York, Lake Forest e Turitg. Igl è il segund hotel che la societad cumpra quest onn. A Florida ha la Z Capital Partners acquistà il Carillon Miami Beach.
Vischnanca da Flem ha plaschair
Sco quai che Adrian Steiger ha laschà savair en ina communicaziun da medias prenda Flem cun plaschair conuschientscha ch’il hotel vegn manà vinavant ed era sanà respectiv bajegià ora. La vischnanca sincerescha al nov possessur da sa gidar en il rom da lur pussaivladads. Steiger punctuescha ch’il Hotel Waldhaus cun sia infrastructura saja relevant per la destinaziun da turissem Flem Laax Falera e l’entira regiun.
Concurs
L'hotel da 5 stailas che aveva gia dapi intgins onns problems finanzials aveva stuì deponer sia bilantscha l'entschatta avrigl 2015. Il manaschi aveva funcziunà ils ultims onns be grazia a gudogns entras venditas d’abitaziuns secundaras. Il favrer ha l’Hotel stuì far amortisaziuns da 30 milliuns francs. Las mesiras per sanar las finanzas e las tractativas cun investiders per surpigliar la societad n'hajan betg purtà fritg, uschia aveva il cussegl d’administraziun infurmà l’avrigl tar ina conferenza a las medias. Per na stuair serrar il hotel e relaschar tut ils collavuraturs ha la «WF Hotelmanagement» surpiglià il hotel e maina quel fin il mars 2016.