Siglir tar il cuntegn

Surselva Hotel Waldhaus a Flem stà curt avant in mument decisiv

En il decurs dals proxims dis duess l’uffizi da concurs communitgar, tgi ch'ha interess da cumprar l’hotel Waldhaus a Flem. Ina situaziun speziala per il directur ed ils emploiads.

En curt temp vegn infurmà sur dal futur dal Hotel Waldhaus a Flem.
Legenda: En curt temp vegn infurmà sur dal futur da l'Hotel Waldhaus a Flem. RTR, L. Livers

Ils 3 da december è stà il davos termin per inoltrar offertas per l’hotel Waldhaus a Flem. Ch'i vegnia decidì ils proxims dis sur dal futur dal hotel fa vegnir in pau gnervus il directur da l'hotel Daniel Füglister. El senta quai era tar ils emploiads.

Fatg tut il pussaivel per in bun avegnir

Tenor Daniel Füglister saja gartegià da tegnair avert l’hotel per betg perder clients. Il hotel stoppia anc restar avert fin ils 31 da mars 2016, la data cura ch’il contract da locaziun cun l’uffizi da concurs va a fin e cura ch’il nov possessur surpiglia l’hotel. I saja era reussì ad el da tegnair ina gronda part dals emploiads, quai che na saja betg simpel en ina regiun perifera. Ultra da quai sajan dus restaurants vegnids renovads ed “Il Tschalèr”, in restaurant da fondue e raclette, vegnia puspè averts sin la stagiun d’enviern. Tut quai sajan bunas premissas per in avegnir cun success da l’hotel.