Siglir tar il cuntegn

Header

cuntegn

Surselva Hotel Pellas a Vella en novs mauns

Ina gruppa d’investiders indigens ha cumprà l’hotel cun 9 chombras e 22 letgs, in alloschi per gruppas enfin 50 persunas ed in restaurant.

audio
Mezdi: Norbert Cavegn cumpra il hotel Pellas a Vella
ord Actualitad dals 10.11.2016.
laschar ir. Durada: 2 minutas 27 Secundas.

Ils novs investiders, ina gruppa da 3 indigens, han surpiglià las aczias da la Hotel Pellas SA entschatta november. Sco nov president da la societad anonima han ils investiders elegì Norbert Cavegn da Vella. El è sez in dals investiders ed è cunzunt enconuschent sco president dal comité d’organisaziun da l’Open Air Lumnezia. Cun l’open air n’haja quella investiziun dentant da far nagut, ha Norbert Cavegn confirmà a RTR.

In hotel che cuntrastescha

La finamira dals investiders è en emprima lingia da manar vinavant l’hotel ed il restaurant, en tge furma n’è dentant anc betg definì. Actualmain sajan els vi da rimnar ideas co modernisar l’hotel. Ina varianta minimala saja da simplamain renovar l’hotel. In’autra varianta prevedia dentant da era engrondir la purschida

Norbert Cavegn, il nov president da l'Hotel Pellas SA.
Legenda: Norbert Cavegn, il nov president da l'Hotel Pellas SA. RTR, Federico Belotti

da letgs. Plans concrets co l’hotel duess vegnir renovà vulan ils investiders preschentar vers la fin 2017. L’entschatta da las lavurs da construcziun èn prevedidas per l’onn 2018, forsa schizunt pir 2019.

Tschertgà: nov gerant

Sco emprim stoppian els tschertgar in nov gerant per l’hotel cun restaurant, ils locataris che mainan actual l’hotel chalian la fin da la stagiun d’enviern. Quai nov gerant ni quella nova geranta na stoppia betg esser ina persuna indigena. Bler pli impurtant saja che quai è ina persuna creativa cun ideas nunusitadas. La finamira dals investiders è numnadamain da crear in hotel che cuntrastescha cun ils hotels existents en la regiun.

Artitgels legids il pli savens