Siglir tar il cuntegn

Surselva Hotel Greina a Rabius resta en ils mauns dals Baselgias

Duri ed Aurelia Baselgia han manà quest hotel 40 onns. Uss van els en pensiun. Lur figl Andreas daventa il possessur nov. Quai saja in grond cletg per els, ha il bab ditg ad RTR.

L'hotel Greina a Rabius
Legenda: L'hotel Greina a Rabius è vegnì bajegia 1882. Da quest temp appartegneva el a la societad dal Bogn Tenigia. RTR, Hubert Giger

Betg stà lev da decider

Andreas Baselgia è cuschinier da professiun e lavura en il hotel Central a Meierhof / Sursaissa. El stat cun sia dunna e las duas buobas ad Affeier. Ils 3 da matg cumenzà el sia nova incumbensa sco possessur da l’hotel Greina a Rabius, el maina l'hotel en la quarta generaziun. I na saja betg stà lev da decider. Els ed era il bab Duri avevan resalvas, perquai ch’i saja in burdi grond. Ina saira haja sia dunna Barbara ditg ch’els pudessan tuttina surprender l’hotel e dapi lura saja l’idea vegnida pli e pli concreta.

Quasi 1 milliun francs

Ins stoppia ponderar bain, tge far, di Andreas. El daventia possessur e stoppia guardar sez co i giaja era finanzialmain. Sco collavuratur vegnia la paja mintga mais ed ins na stoppia far gronds quitads. Sco el di, stoppia el probabel impunder quasi in milliun francs per l’hotel; la mesadad èn investiziuns en l’ustaria ed en ina cuschina nova.

Plirs avantatgs

Mo i dettia era plirs avantatgs cun l’hotel Greina. Sch’els cumprassan ina chasa nova stuessan els probabel era pajar tant. Ord vista famigliara haja el meglier suenter a Rabius, perquai ch’el saja en chasa e vesia regularmain sia dunna e sias duas buobas. E la finala surprendia el insatg agen. In ulteriur avantatg è ch’el ha in bun num sco cuschinier cun 12 puncts da Gault Millau. Impurtant saja che la cuschina saja buna e ch’ils giasts vegnian adin puspè, di l'um che ha 36 onns.

RR actualitad 07:00