Siglir tar il cuntegn
Inhalt

Surselva Hotel da la Posta a Platta en novs mauns

Dapi var set onns è quest hotel cun restaurant vid. Dacurt ha il Tessinais Flavio Pagnamenta cumprà el e fatg plans per realisar in center da terapia. Ma quels plans na pon betg vegnir realisads, tranter auter, perquai che l’hotel è en la zona da privel 1.

A partir dal 2018 ha l’hotel da la Posta a Platta in nov possessur: Nicola Pagnamenta ha cumprà el da Flavio Pagnamenta (els n'èn betg parents). El vul realisar in simpel hotel cun letgs ed ensolver (bed and breakfast) surtut per persunas che fan sport. Avert è l’hotel l’entir onn. En il restaurant datti gastronomia tessinaisa e grischuna.

Nicola Pagnamenta ha 52 onns. El è restauratur da mobiglias, sia gronda passiun è dentant la gastronomia. Al lai da Lugano ha el in grotto ed el posseda la firma da catering «Ristorent» che dat en locaziun inventaris per restaurants e producescha era mangiativas sco per exempel charn.

En la zona da privel 1

El haja betg fatg grondas investiziuns en l’hotel, be renovà las sis chombras e per part dà colur las paraids. Il palantschieu dal restaurant è fatg cun plattas da crap.

El na pudess er betg far grondas investiziuns, vul dir da quellas che augmentan la valur, perquai che l’hotel da la Posta a Platta è dapi 1986 en la zona da privel 1. Uss èn il possessur da l’hotel, la vischnanca da Medel ed il chantun en contact per chattar ina schliaziun, sco Gian Carlo Leeger da l’Uffizi per guaud e privels da la natira ha confirmà ad RTR. Ina pussaivladad fiss da metter l’hotel ed era intgins bajetgs a Platta da la zona 1 en la zona 2. Per pudair far quai, stuess ins eventualmain rinforzar il rempar ubain construir dapli lavineras.

Lunga tradiziun

L’hotel da la Posta a Platta è vegnì bajegià 1875. 1896 ha Bistgaun Venzin da Pardé cumpra el. Plirs decennis è l'hotel restà en possess dals Venzins, fin che la famiglia Candreia ha acquistà el l'onn 1956. E dacurt ha quest hotel puspè midà maun da Flavio tar Nicola Pagnamenta.

RR actualitad 07:00