Sco il commember dal comité d’organisaziun dals dis da schlagher a Sedrun, Stefan Birri di sajan ins stads cuntent cun l’occurrenza ad Andermatt. Per cuntinuar avessi quai dentant duvrà dapli sustegn dad Andermatt. Quai na saja dentant betg stà il cas.
Anzi il cuntrari, di Birri. Pervi da las bleras occurrenzas ad Andermatt saja il sustegn schizunt daventà pli pitschen. Perquai hajan ins tschertgà in nov partenari e la finala chattà quest cun la vischnanca da Tujetsch.
La vischnanca haja garantì in sustegn a lunga vista. Uschia possian ins etablir ils dis da schlagher a Sedrun tar il pli grond festival da schlagher en Svizra, di Birri vinavant.
Stars da schlagher cun renum internaziunal
Il festival cuzza auter che quel ad Andermatt dus empè da trais dis. Birri quinta cun var 2000 fin 2500 visitaders, quai ch’è pli u main la mitad dal festival da l’onn passà. Uschia sa reduceschia era il budget per la mesadad sin 250’000 francs. 40 pertschient vegnian curclads cun sponsurs, il rest entras la vendita da bigliets e la gastronomia.
Tge stars dal schlagher che vegnan a sa preschentar na vul Birri anc betg tradir. Ins possia dentant quintar cun var 12 stars da renum internaziunal.
Il festival è ils 9 e 10 da settember 2016. Ils otg quintan ils organisaturs da far in di da las portas avertas cun musica da schlagher per ils abitants da la regiun.