Heidi Jerger malegia surtut cun colurs d’acril. Ils maletgs cun pigments natirals collia ella cun sablun, chaltschina, tschendra u crida.
Sablun, chaltschina, tschendra e crida
Quai vul dir: Enstagl da colurs normalas sco p.ex. alv u nair prenda ella tschendra e crida. Sia tecnica è da far la colur da basa cun crida e sablun. Quai laschia ella sientar ed alura cumenzia ella a malegiar. Ella na fetschia betg ina skizza ordavant, ella malegia rasada sin rasada. Sias colurs preferidas sajan blau e rosa.
Malegiar è vita
Ils objects preferids èn ils umans, la natira ed animals sco per exempel las chauras (trais fan part da sia exposiziun). Malegiar saja «vita». Pli baud malegiava ella sper sia professiun, uss saja quai ses senn da la vita.
Heidi Jerger di, ch’ella saja mintga di en ses atelier a Surcuolm. Quel vegnia dentant prest a Flond, nua ch’ella stat dapi il 2011. La pictur-artista è naschida a Frankfurt. Dapi 1962 è ella en Svizra.
In fresco ed in cudesch cusì ensemen
A l'exposiziun en il Museum Cuort Ligia Grischa preschenta ella er in fresco. Er quel ha ella cumenzà cun chaltschina e sablun ed alura cuntinuà cun pigments, cun colurs fermas.
In’autra ovra speziala è in cudesch en ina vitrina. Quest cudesch ha ella cusì ensemen cun dissegns e fotografias da ses maletgs. Plinavant preschenta ella ses trais cudeschs cun atgnas ovras.
L’exposiziun cuzza fin ils 23 da fanadur 2017.
RR actualitad 06:00