«Guglielmo Tell» , inscenaziun moderna

Questa stad inscenescha l'Opera Viva a Sursaissa l'opera «Guglielmo Tell» dal cumponist Gioachino Rossini. Malgrà che la materia dal Wilhelm Tell è plitost veglia, duai l'opera survegnir in'inscenaziun en ina moda e maniera moderna.

Andrea Zogg, Gion Gieri Tuor, Claudio Pfister, Roman Benker

Legenda da maletgs: Il reschissur ed actur grischun Andrea Zogg, il manader artistic Gion Gieri Tuor, il president da l'Opera Viva Claudi... RTR / G. Gabriel

«Las melodias da Gioachino Rossini èn insatge nunditg grondius», declera Gion Gieri Tuor, il manader artistic da l'Opera Viva. Il «Guglielmo Tell» saja stà la culminaziun da la lavur da Rossini.

Il chor da l'Opera Viva

Legenda da maletgs: Il chor ha gia emprendì la part musicala. En ina proxima fasa vai vid l'inscenaziun da l'opera. RTR / G. Gabriel

«Il public vegn ad udir massa chant da chors. Dasperas dentant er bels ensembles da solists», uschia Gion Gieri Tuor. La part musicala ha il chor gia emprendì. Ussa mondia vid l'inscenaziun da l'opera, pia vid il manar ensemen il chor e la reschia.

«Musica va direct el cor»

La reschia dal «Guglielmo Tell» maina il reschissur ed actur grischun Andrea Zogg. El n'ha anc mai manà reschia d'ina opera. «Musica va direct en il cor. I na dovra nagina translaziun intellectuala.» Quai saja il bel vid la musica ed era il motiv daco ch'el haja surpiglià quest project.

Nagina inscenaziun istorica

«Il visitader po spetgar sco emprim bellezia musica da Rossini. Sco segund era il tema da la libertad e dal cumbat per libertad ord la vesta dad ozendi.» L'opera n'è betg inscenada en in stil istoric, mabain en ina moda e maniera moderna. Cun inscenar istoricamain vegnia il mitos dal Wilhelm Tell instrumentalisà memia fetg da la politica, manegia Zogg. E cun l'inscenaziun moderna dal toc haja el era pudì allontanar il conflict tranter terra e citad.