Grev da chattar persunas qualifitgadas

La vischnanca da Tujetsch tschertga in manader dal center communal, las vischnancas da Vuorz ed Andiast tschertgan in chanzlist communal. Il manader dal center communal da Tujetsch stoppia surprender «la responsabladad generala per l’administraziun communala», èsi scrit en l’inserat.

La chasa communala a Sedrun.

Legenda da maletgs: La chasa communala a Sedrun. RTR, H. Giger

I vegn pretendi bler da talas persunas en funcziuns da cader. Era sche la paja saja en urden na saja quai betg simpel da chattar persunal qualifitgà. Il problem saja che questas persunas na sajan betg prontas da lavurar en regiuns periferas ed en uffizis nua ch’ins saja exponì, di Giachen Caduff da l’Uffizi da vischnancas dal Grischun. Vitiers vegnia ch’in manader d’in center communal ubain in chanzlist duess savair rumantsch.

Spezialist cun diplom federal

Per emprender questa professiun datti ina scolaziun a la Scol’auta per tecnica ed economia HTW a Cuira. Sco il docent Ursin Fetz di, hajan els d’ina vart ina purschida nova (ensemen cun la scola IBW): in spezialist da l’administraziun publica cun in diplom federal. Da l’autra vart porscha la HTW in CAS, in certificat per manaders da chanzlias e persunas da l’administraziun chantunala. Ursin Fetz manegia che questas persunas stoppian avair cumpetenzas da manager, surtut era suenter las fusiuns da vischnancas.

Avantatg da fusiuns

Fusiuns hajan dentant era l’avantatg ch’ins chatta forsa pli tgunsch persunas per l’administraziun. Las lavurs vegnian numnadamain repartidas sin pliras spatlas.