Siglir tar il cuntegn
Inhalt

Surselva Glion: Sulet ina candidata per il presidi

Tar las elecziuns da la vischnanca da Glion datti mo ina candidata per il presidi communal. Per ils ulteriurs quatter commembers da la suprastanza ch'èn d'eleger datti dentant tschintg candidatas e candidats.

La vopna da Glion.
Legenda: La vopna da Glion. RTR, L. Livers

Per las elecziuns communalas da Glion dals 21 da matg èn ils candidats uffizials enconuschents, communitgescha la vischnanca. Per il post dal presidi da vischnanca datti mo ina candidatura uffiziala, numnadamain quella da Carmelia Maissen da la fracziun Castrisch. L’architecta, che lavura a temp parzial tar in biro da svilup regiunal, è sa retratga dal parlament da Glion per pudair candidar sco presidenta communala.

Carmelia Maissen, la suletta candidata per il post sco presidenta communala.
Legenda: Carmelia Maissen, la suletta candidata per il post sco presidenta communala. RTR, F. Belotti

Tar l‘elecziun da la suprastanza communala datti dentant dapli candidats che sez libers. Dasper il president communal Aurelio Casanova (Glion) han era Monica Hänny (Castrisch) e Gerold Hafner (Glion) demissiunà sco suprastants. Per remplazzar els èn s’annunziads trais novs candidats:

  • Hanspeter Bundi (Castrisch)
  • Caroline Gasser (Glion)
  • Lucas Valaulta (Rueun)

Damian Cadalbert (Sevgein) e Roman Cantieni (Glion) stattan vinavant a disposiziun ed èn perquai automaticamain candidats uffizials per la suprastanza communala.

Parlament tschertga otg novas u novs

Tar il parlament, che cumpiglia 25 persunas, èn otg commembras e commembers sa retratgs. Per remplazzar quels sez libers èn s’annunziads nov candidatas e candidats uffizials ord differentas fracziuns. Spezial tar quellas elecziuns è, che votantas e votants da Glion pon vuschar era per candidats ord autras fracziuns che lur atgna. Quai n’è betg stà pussibel durant l’emprima elecziun da la vischnanca fusiunada.

Tenor la constituziun da Glion èsi dentant era pussibel d’eleger autras persunas che n’èn betg sin la glista da candidats uffizials.