Siglir tar il cuntegn

Header

Navigaziun

purtret da Aurelio Casanova
Legenda: Aurelio Casanova è l'emprim president communal da la vischnanca fusiunada Ilanz Glion. RTR, Martin Valär
cuntegn

Surselva Glion sto tschertgar in nov timun

Ussa èsi cler: il president communal da Glion, Aurelio Casanova, na vegn betg pli a candidar per in ulteriur temp d’uffizi. Quai ha el confermà en ina communicaziun a las medias. El haja manà il presidi cun grond plaschair ed engaschi, ma la chargia suenter la fusiun saja era stada gronda.

La vischnanca funcziuneschia oz bain e las structuras sajan consolidadas. Cun quai ch’el cuntanschia la vegliadetgna da pensiun il 2018 saja ussa il dretg mument per dar vinavant il timun.

Aurelio Casanova ha cumenzà ses uffizi ils 1-01-2014 sco emprim president da la vischnanca fusiunada Ilanz Glion. Avant ha el gidà da preparar la fusiun da 12 vischnancas en il conturn da Glion sco president da la cumissiun operativa.

Era la commembra da suprastanza Monica Hänny da Castrisch na vegn betg pli a candidar per ina ulteriura perioda d’uffizi, sco ella ha confirmà a RTR. Autras renunzias da commembers da la suprastanza communala n’èn anc betg enconuschentas. Enfin la fin schaner pon talas dentant anc vegnir inoltradas.

Novas candidatas ni novs candidats per la suprastanza communala sco era per il post da president/a communal/a n’èn anc betg enconuschentas. Ils presidents da pliras partidas politicas han confirmà, ch’els sajan a la tschertga da candidats, concretas propostas na dettia dentant anc betg.

RR novitads 08:00