Siglir tar il cuntegn

Header

cuntegn

Surselva Glion: Preventiv 2017 cun deficit da 600’000 francs

Il parlament da la vischnanca da Glion ha acceptà ier saira a Rueun il preventiv 2017 che preveda ina sperdita da 600’000 francs. Ina proposta da renviar il preventiv ha il parlament refusà cun 12 encunter 11 vuschs.

Las investiziuns nettas ha il parlament reducì da 8,5 milliuns sin circa 7,3 milliuns francs. Quai cun stritgar il project da sanaziun da la Via La Lutta / Via Quinclas en la citad da Glion. Il project da dus onns munta custs totals da CHF 1’760’000 francs. Per l’onn 2017 eran planisads CHF 930’000 francs.

Ils pes da taglia da las fracziuns da Glion avant la fusiun.
Legenda: Ils pes da taglia da las fracziuns da Glion avant la fusiun. Grafica RTR

Pè da taglia resta a 100%

Plinavant ha il parlament era betg acceptà la proposta da la suprastanza d’auzar il pè da taglia da 100% sin 110%.

Quai auzament avess purtà entradas supplementaras da 900’000 francs. I saja simplamain memia baud da discurrer d’in auzament dal pè da taglia, han plirs parlamentaris argumentà.

Il pè da taglia da 100 % saja stà in motiv per la fusiun ed in auzament gia trais onns suenter la fusiun na vegnia betg acceptà da la populaziun.

Aurelio Casanova, il president communal da Glion.
Legenda: Aurelio Casanova, il president communal da Glion. RTR, Linus Livers

6,9 milliuns per la scola professiunala

In credit d’obligaziun da 6,9 milliuns per la sanaziun e l’engrondiment da la scola professiunala a Glion ha il parlament approvà cun 24 encunter 0 vuschs (cun 1 abstenziun). Tenor planisaziun duessan las lavurs entschaiver entschatta stad 2017 e cuzzar enfin l'avust 2018. Senza questas investiziuns stuess la scola professiunala, tenor la suprastanza, serrar las portas.

Artitgels legids il pli savens