Glion: Ovras electricas pajan dividendas da passa 3 milliuns

Las ovras electricas da Glion e Rain Anteriur pajan communablamain dividendas da passa 3 milliuns francs als acziunaris. La radunanza da delegads da las duas interpresas ha approvà la dumonda dal cussegl d’administraziun.

Il lai da Pigniu da surengiu.

Legenda da maletgs: Il lai da fermada da Pigniu che tutga tar l'Ovra electrica Glion. Keystone

Ils acziunaris da las ovras electricas Rain Anteriur SA survegnan ina dividenda da 2,5% sin il chapital d’aczias da 80 milliuns francs, quai che fa 2 milliuns francs. La dividenda da las ovras electricas Glion munta a 2,25% sin in chapital da 50 milliuns francs, pia 1,125 milliuns francs.

Producziun d'electricitad è creschida in zic

Tenor l’interpresa Axpo, che tegna la gronda part da las aczias da las duas ovras electricas, han las duas ovras electricas produci in zic dapli electricitad che la media dals ulitms 10 onns. Tut en tut han las ovras Rain Anteriur produci 854 milliuns uras kilowatt, las ovras Glion passa 260 milliuns uras kilowatt.

RR novitads 14:00