Siglir tar il cuntegn

Surselva Glion: Nov sviament, nov Coop

Cun il nov sviament per la citad da Glion, para la vart sanestra dal Rain da daventar pli attractiva. Il nov center vul il Coop en mintga cas far gist sper il sviament.

Il bajetg nov dal center COOP e bajegiads sin pitgas
Legenda: La zona da bajegiar Grüneck s ‘chatta gest sper la nova rundella da sviament da Glion mad

Ils profils en tschentads, ils contracts suttascrits, ussa èsi definitiv: Il Coop bajegia in nov center a Glion. Cun inoltrar la dumonda da bajegiar a la vischnanca da Glion è la midada segira. Primavaira 2017 duai vegnir cumenzà a bajegiar e la primavaira 2018 pudess il nov center gia vegnir inaugurà.

Quest project cun ina surfatscha da vendita da 2'000 meters quadrats, custa 25 milliuns francs.

Ina chasa ed in clavà vegnan spazzads

Per il bajetg nov dal Coop gist sper il Coop Bau und Hobby, sto la anteriura ustaria Grüneck guntgir. Medemamain vegni a dar in nov access per tut las stizuns dal quartier pertutgà. Direct davent da la nova rundella vegnan las butias Aldi, Coop Bau und Hobby ed il nov center dal Coop ad esser cuntanschiblas. Tranter il nov bajetg dal Coop ed il Bau und Hobby vegni a dar ina passarella, uschia ch'ils var 90 parcadis en il nov center servan al center existent.

I vegn a dar ina garascha averta cun glisch dal di. Quai saja ozendi in giavisch da la clientella, ha ditg Elmar Girardi il manader da fatschenta da la Zima SA che planisescha il center per il Coop.

Bajegià vegn sin terren cun dretg da construcziun. Il possessur, la Grüneck SA da Glion, vegn sezza a construir in tancadi cun indrizs da lavar autos ed in shop davant il nov center dal Coop.

RR actualitad mezdi 11:00