Siglir tar il cuntegn
Inhalt

Surselva Glion: Montalta SA surpiglia parts da la Candreja SA

La Montalta SA surpiglia la partiziun betun, las aczias da la Gera e betun Schluein SA e la partiziun da transports da material per plazzals. La Candreja SA sa concentrescha en l’avegnir sin la fatschenta da bavrondas, il transport d’aua da Val ed il commerzi da carburant.

La firma Montalta SA da Glion surpiglia da la Candreja SA las parts da far betun, las aczias da la Gera e betun Schluein SA e la partiziun da transports da material per plazzals. Quai han las duas interpresas communitgà oz en ina conferenza da medias a Schluein.

Cun la surpigliada da quellas parts vegn fundà ina nova interpresa Montalta transport e glera SA. Il manader da questa fatschenta è Manuel Montalta. La Candreja SA sa concentrescha en l’avegnir sin la fatschenta da bavrondas, ils transports d’aua da Val ed il commerzi da carburant.

Tut ils lavurers salvan lur plazzas

Ils 22 lavurers da la Candreja SA salvan lur lavur e vegnan integrads en la nova firma Montalta transport e glera SA, che vegn uschia da avair la finala 58 lavurers.

Sur dal pretsch da cumpra na dat i naginas infurmaziuns. La midada vala davent da l’emprim da fanadur.

RR novitads 11:00