Siglir tar il cuntegn
Inhalt

Surselva Glion: Midada da maun dal Salon Erica

Suenter 50+1 onns (sco ella scriva sezza) smetta la coiffeusa Erica Caduff e surdat sia fatschenta, il Salun Erica a Glion, ad ina successura.

Oriunda da Quarten sur il Lai Rivaun ha Erica Caduff fatg a Sargans l'emprendissadi da coiffeusa e lavurà suenter 2 onns a Flem. Lura ha ella pudì surpigliar ina fatschenta da coiffeur d'umens a Glion. Ella ha dentant tschertgà vinavant, perquai che sia finamira era in salun per umens e dunnas. L'atun 1973 ha ella lura pudì surpigliar las localitads en la Via S. Clau sut, nua che sia fatschenta «Salon Erica» sa chatta anc oz.

Bleras midadas

En tut quels onns ch'ella ha lavurà sco coiffeusa ha Erica Caduff sa chapescha era vis bleras midadas. Buc mo las frisuras sajan vegnidas sur ils onns pli luccas e libras, mabain era il svilup tecnic, cunzunt tar las colurs da chavels, haja dà adina dapli pusseivladads ad ella d'esser creativa. Fitg sa midà saja dentant era il temp da lavur. Pli baud faschevan las damas in termin gia emnas ordavant ed ils umens vegnivan simplamain la sonda en il salun e spetgavan enfin ch'els vegnivan vidlonder. Ozendi saja la sonda il di cun il pli pauc lavur.

Decisiun spontana

La decisiun da chalar e da surdar sia fatschenta ad ina successura saja crudada quasi spontan la stad vargada. In di haja ella udì ch'ina giuvna coiffeusa - la feglia d'ina famiglia ch'ella enconuscha gia dapi onns entras sia lavur - tschertgia in agen local, sche pussaivel a Glion. Ella haja lura gì contact cun quella giuvna e curt temp suenter ès i stà cler ch'ella vegn a surdar il salun a Nina Caveng.

Erica Caduff e Nina Caveng festiveschan la surdada da fatschenta sonda ils 28 d'avrigl da las 14:00 cun in apero.

Total local 11:45