A Glion è vegnì dà l’emprima badigliada per la nova staziun da la Viafier retica (VR). Investì vegnan total 30 milliuns francs per renovar il bajetg da la staziun existenta e per adattar ils binaris a las prescripziuns da segirtad vertentas.
Uschia vegn bajegià in sutpassadi per ch’ils passagiers possian cuntanscher ils binaris senza stuair traversar auters binaris. Plinavant vegn l’entira staziun adattada als basegns da persunas cun impediments. La nova staziun duai vegnir averta il december 2018.
Planisaziun da 8 onns
Tenor il directur da la VR Renato Fasciati ha la planisaziun per quella renovaziun cumenzà gia l'onn 2008. Ina lunga fasa da planisaziun, ma l'emprim haja la viafier stuì dischlocar il transport da laina a Rueun ed il transport da vitgira a Schnaus, duas staziuns en vischinanza da Glion. Vinavant hajan els stuì spetgar sin il project definitiv dal sviament da Glion per savair planisar la part da la staziun che sa chatta sper la punt da Glion.
La davosa staziun da las grondas
Glion è tenor Fasciati la davosa da las grondas staziuns da la VR che vegn modernisada ed adattada a la lescha per persunas cun impediments. Glion saja dentant l’emprima staziun en Surselva. Las ulteriuras staziuns da la Surselva stoppian anc vegnir renovadas, uschia che la VR vegni anc ad investir bler en la Surselva ils proxims onns.
Ord l'archiv:
