Siglir tar il cuntegn
cuntegn

Surselva Glion: La claustra dominicana producescha energia

La claustra dominicana producescha cun ina ovra idraulica per aua da baiver circa 250’000 uras kilowatt per onn. Avunda per 60 enfin 80 chasadas.

Il reservuar resp. l'ovra idraulica a Prau Vert sa chatta circa 300 meters sur la claustra da Glion.
Legenda: Il reservuar resp. l'ovra idraulica a Prau Vert sa chatta circa 300 meters sur la claustra da Glion. RTR, Carlo Albin

L’ovra idraulica sa chatta en il reservuar d’aua Prau Vert, circa 300 meters sur la claustra da Glion. Ina lingia da pressiun maina l’aua da baiver davent dal reservuar Gonda a Ladir sin il generatur che sa chatta 440 meters pli bass. La prestaziun spetgada è da 250’000 kw/h per onn, quai che correspunda al consum d’energia da 60 fin 80 chasadas.

Part dal provediment d’aua

La claustra dominicana a Glion posseda dapi pli che 80 onns in agen provediment d’aua cun funtaunas en il conturn dal vitg Ladir. Davent da l’onn 2002 vegnan quellas funtaunas, ils reservuars e las lingias d’aua renovadas pass per pass, in project da total 1,3 milliuns francs. L’onn 2011 han las lavurs vi da la lingia tranter ils reservuars Gonda e Prau Vert cumenzà, ina lingia cun ina differenza d’autezza da 440 meters. Spert saja perquai, tenor la priura generala Sora Annemarie Müller, naschida l’idea da bajegiar ina ovra idraulica. Enstagl d’ina lingia d’aua normala saja vegnì installà in conduct da pressiun ed en il reservuar Prau Vert il generatur.

Energia per la rait

L’energia producida vegn furnida cumplainamain en la rait d’electricitad, la claustra na dovra betg sezza quell’energia. L’ovra è vegnida planisada l’onn 2011 e lura n’eri anc betg pussibel da duvrar sez l’atgna energia. Uschia va l’energia en la rait e la claustra incassescha l’ indemnisaziun per cuvrir ils custs da la furniziun d'electricitad (KEV). Era sche la claustra duvrass sezza l’energia, ella na tanschess betg da cuvrir il consum. Tenor Sora Annemarie munta il quantum d’energia producida ad 1/3 dal consum total da la claustra.