Siglir tar il cuntegn
Inhalt

Surselva Glion ha incassà memia pauc per l’aua

Suenter quatter onns dovra la vischnanca da Glion gia ina revisiun da la lescha dal provediment d’aua. Cun la lescha actuala n'ha la vischnanca betg pudì cuvrir ils custs dal provediment da l'aua.

Purtret Aurelio Casanova president vischnanca da Glion.
Legenda: Aurelio Casanova: La revisiun d'ina lescha suenter quatter onns è normal. RTR, Linus Livers

Cun las leschas da provediment d'aua regla la vischnanca las taxas d’aua tschuffa e d’aua schubra. La vischnanca duess incassar tant ch' i tanscha per cuvrir ils custs e las investiziuns. La lescha federala prevesa perencunter ch'i na duai betg vegnir fatg gudogn cun l’aua ed er perditas ston vegnir evitadas. Quai ch’è capità a Glion.

La suprastanza ha orientà il parlament che quellas leschas dovrian ina revisiun. Tranter auter vul la suprastanza dismetter la pauschala dat 80 francs sin mintga perchasa, ha Aurelio Casanova il president da la vischnanca da Glion ditg.

Ina maschaida d’auzar la taxa da basa ed il pretsch dal cubic aua duess la finala purtar las contribuziuns per cuvrir ils custs.

Custs che spetgan sin la vischnanca a Glion en surtut custs per sparter l'aua da meteor da l'aua tschuffa. Quai n'è anc betg succedì dapertut en la vischnanca. Cheu spetga la suprastanza custs da 15 milliuns francs ils proxims 15 onns.

Il parlament da Glion vegn a tractar questa revisiun proximamain.