Il cudesch «Istorgia da Glion / Foppa» è il prim cudesch scientific che tracta la istorgia da la citad da Glion. Sin basa da quest cudesch ha la curatura dal Museum Regiunal Surselva, Marianne Fischbacher, concipì ina exposiziun che mussa il svilup da la regiun da Glion davent la gronda bova da Flem (avant rodund 9’500 onns) enfin il temps dad oz.
Cunquai che il Museum Regiunal Surselva na posseda betg objects per cuvrir tut quest temps, ha Marianne Fischbacher dumandà differents museums ed archivs dal Grischun per agid. Quai è gartegià ed uschia èn da vesair plirs objects da gronda valur istorica. Tranter auter copias da munaida dal stgazi chattà en la ruina dal chastè da Carniec.
Istorgia da Glion resta tema per 3 onns
L'exposiziun actuala che mussa il passà è mo l'emprima da duas exposiziuns. En in onn e mez vul Marianne Fischbacher crear ina secunda exposiziun sur dal futur da Glion. Suenter la fusiun da la vischnanca da Glion cun las vischnancas vischinas l’entschatta dal 2014, na existia la vischnanca preschentada en l’exposiziun actuala betg pli. Quella midada saja in bun mument, per far ina curta pausa, mirar enavos e studegiar sur dal futur. La secunda exposiziun duess lura era restar averta per in onn e mez.