La suprastanza communala da Glion vuleva tenor messadi contribuir 100'000 francs vid in pumptreck a Fontanivas. Quel duess vegnir construì sin la parcella tranter il bogn avert da Glion ed il plaz da ballape. Damai ch'il club da ballape ha gì dumondas che n'han betg pudì vegnir respundidas avant la sesida, è la tractanda vegnida spustada.
Uschia è il parlament en l'ulteriur decurs da la saira vegnì infurmà sur da projects currents, sco il concept da parcar, il concept da promoziun da cultura u la renovaziun da la chasa da scola a Castrisch. Quella è vegnida veglia e la suprastanza ha preschentà duas variantas co ina renovaziun pudess vesair ora. Tut tenor svilup saja pussaivel ch'i dat a Castrisch ina halla da cultura che duai servir a tut las fracziuns da Glion. Sco emprim vegnian ussa ils abitants da Castrisch e Sevgein infurmà sur dals plans.
