Siglir tar il cuntegn

Surselva Glion: «communicaziun.ch» surpiglia «Artolino»

L'interpresa da communicaziun surpiglia l'interpresa da tecnica da reclama «Artolino» per cumplettar sia atgna purschida cun per exempel blatgas da reclama, inscripziuns e tatgaders.

Il local da la Artolino SA en la via S. Clau sura a Glion.
Legenda: Il local da la Artolino SA en la via S. Clau sura a Glion. RTR, C. Albin

Il pli impurtant en curt:

  • L'interpresa da communicaziun «communicaziun.ch» surpiglia la «Artolino SA», ina interpresa da tecnica da reclama.
  • Cun quella integraziun cumplettescha communicaziun.ch sia purschida.
  • Tut las 7 plazzas da lavur vegnan integradas tar communicaziun.ch.

Tenor il manader da fatschenta Armin Spescha surpiglia l'interpresa «communicaziun.ch» davent dals 1 da favrer 2018 l'interpresa da tecnica da reclama «Artolino» a Glion. Cun quella acquisiziun cumplettescha l'interpresa da communicaziun sia purschida e po uschia producir intern da nov per exempel era blatgas da reclama, inscripziuns e tatgaders.

Armin Spescha da communicaziun.ch (san.) e Peter Frangi da Artolino.
Legenda: Armin Spescha da communicaziun.ch (san.) e Peter Frangi da Artolino. mad

«Artolino» daventa partiziun

L'interpresa «Artolino» vegn integrada cumplettamain sco nova partiziun «tecnica da reclama». Las collavuraturas ed ils collavuraturs d'Artolino vegnan dentant per il mument a lavurar vinavant en las localitads actualas a Glion. Armin Spescha è vidlonder da tschertgar ina soluziun co rimnar tut las partiziuns sut il medem tetg.

Cun integrar las 7 plazzas da lavur d'Artolino a Glion vegn communicaziun.ch a porscher da nov en tut lavur a 50 persunas.

RR novitads 12:00