Siglir tar il cuntegn
Inhalt

Surselva Glion: 120'000 francs per il Museum Regiunal Surselva

Il parlament da Glion ha decis da sustegnair la renovaziun da la Casa Carniec, il domicil dal Museum Regiunal Surselva, cun bunamain 120'000 francs.

La Casa Carniec, il domicil dal Museum Regiunal Surselva amez la citad veglia da Glion, duai vegnir renovada.
Legenda: La Casa Carniec, il domicil dal Museum Regiunal Surselva amez la citad veglia da Glion, duai vegnir renovada. RTR, L. Livers

A la radunanza dals 7 da mars ha il parlament da Glion decidì da sustegnair la renovaziun da la Casa Carniec, il domicil dal Museum Regiunal Surselva a Glion, cun ina summa totala da CHF 118'496.10. Tenor ina communicaziun a las medias, renconuschia il parlament cun quella decisiun la muntada dal museum sco impurtant lieu da cultura e da la Casa Carniec sco bajetg represchentativ da la citad veglia da Glion.

Vischnanca da domicil e cumpart Regiun Surselva

Quels CHF 118'496.10 che la vischnanca da Glion surpiglia sa cumponan da duas parts. Per l'ina èn quai CHF 100'000.- che la vischnanca paja sco vischnanca da domicil dal museum. Plinavant ha la vischnanca da pajar sia cumpart dals CHF 100'000.- che la Regiun Surselva dat, e quai èn exact CHF 18'496.10.

Custs totals da CHF 938'000.-

Tenor il preventiv preschentà muntan ils custs totals da la renovaziun da la Casa Carniec CHF 938'000.-. Gronds posts en quai preventiv èn la renovaziun da la fatschada e da fanestras (CHF 139'000.-) e la sanaziun tecnica da l'illuminaziun e dals detecturs d'incendis (CHF 129'300.-).

La finanziaziun da quella renovaziun duai succeder sco suonda:

Survista finanziaziun da la renovaziun Casa Carniec

tgira da monuments federala / chantunala
CHF 200'000.-
consentì
Regiun Surselva
CHF 100'000.-
consentì
vischnanca Glion
CHF 100'000.-
consentì
Padrinadi svizzer per vischnancas da muntognaCHF 200'000.-
dumandà
Ernst Göhner Stiftung
CHF 150'00.- enfin 200'000.-
preorientà
crowdfunding per in ascensur
CHF 70'000.-
en preparaziun
donaturs, ulteriuras fundaziuns, sponsurs
CHF 68'000.-

TotalCHF 938'000.-

RR novitads 12:00