Siglir tar il cuntegn
Inhalt

Surselva Gion Gieri Sgier – 40 onns scolast a Sevgein

«Jau vom anc oz mintga di gugent a dar scola.»

Il scolast davant che instruescha ina gruppa d’uffants.
Legenda: Istorgias prelegidas fascineschan oz sco pli baud. RTR, Linus Livers

Entschet a dar scola a Sevgein ha Gion Gieri Sgier l'onn 1977, gist suenter il seminari. Cun il di dad oz ha el dà scola 40 onns en la medema vischnanca, en la medema scola, en la medema stanza.

L'onn 1977 ha Sevgein introducì ina scola cumplessiva e quai suenter che la scola era stada serrada set onns.

L’emprima scolara ch’el ha gì da sias uras ha quest onn 50 onns ed era vegnida en la quarta classa tier el en scola. Il pli paucs scolars ch’el ha gì èn stads nov en trais classas. Ils pli blers ch’el ha gì èn stads 19, medemamain en trais classas. Dasperas ha Gion Gieri Sgier fundà e manà la musica da giuvenils Steilalva.

Jau vai gugent dà mias forzas per il vitg da Sevgein.
Autur: Gion Gieri Sgierscolast

El ha era surpiglià il chor viril e la finala midà quel en in chor maschadà. Ed ina da sias activitads preferidas è la gimnastica. Cun in surrir raquinta el, che la halla nova bajegiada ils onns 1987-88 haja gidà da tegnair el en il vitg da Sevgein. Oriundamain n'avevia el franc betg en il senn da restar 40 onns en il medem lieu.

Ussa, 40 onns pli tard, saja la segunda generaziun gia tar el en scola, e quai plaschia ad el. Cura ch'el avevia finì il seminari, avevia quai era num: Sche ti has dà 40 onns scola, sas ir en pensiun. Oz sappia el che 40 na tanschian betg, el haja anc quatter onns e speria da pudair finir sia carriera sco ella ha entschet, a Sevgein.

RR actualitad 17:00