Siglir tar il cuntegn

Header

Portrait da Bruno Abegg, perscrutader da turissem
Legenda: RTR
cuntegn

Surselva Gieus olimpics 2026: La vista d’in perscrutader da turissem

Per Bruno Abegg, professur a l’universitad Innsbruck e perscrutader da turissem, n‘èn gieus olimpics betg in med universal che schlia tut ils problems. I dovria dapli.

Las ideas e finamiras preschentadas dals promoturs en il dossier Gieus olimpics 2026 sajan en sasez ina buna chaussa. I vegnia dentant spetgà memia bler da quest eveniment. Ins na possia betg simplamain manar tras gieus olimpics e tut vegnia bun. Bler dependia da tge che vegni fatg o da quella schanza.

Gieus èn in program da svilup regiunal

Gieus olimpics sajan in program da svilup regiunal. Ina schanza da survegnir daners d'ordaifer per sviluppar l'economia ed il turissem en il Grischun. Il preventiv da circa 1,6 milliardas francs ch'ils promoturs han preschentà en il concept metta Bruno Abegg dentant en dumonda. Quai preventiv saja pli bass ch’il preventiv dals gieus olimpics a Lillehammer 1994. Las pretensiuns p.ex. en ils secturs da segirtad e communicaziun sajan uss dentant bler pli autas che avant passa 20 onns.

Decisiun difficila

I dettia buns arguments pro sco era contra quai project ed i na saja betg simpel da prender ina decisiun. Il concept actual saja bler mo ideas e visiuns ed ils 12 da favrer vegnia votà sur d'in credit per elavurar quest concept en detagl. Quels detagls che na sajan anc betg enconuschents, hajan dentant gia uss ina influenza sin la votaziun.