Siglir tar il cuntegn
Inhalt

Surselva Giasts grittentads e blera critica a Mustér

La surpraisa è stada gronda a Mustér, cura ch’ins ha constatà ch’ils 180 plaz da seser na tanschevan betg. Var 400 persunas èn vegnidas a l’orientaziun davart las novas taxas turisticas per possessurs d'abitaziuns da vacanzas. I regiva ina atmosfera pulit chargiada.

L’interess è stà fitg grond a l’orientaziun davart la novas taxas turisticas.
Legenda: L’interess è stà fitg grond a l’orientaziun davart la novas taxas turisticas. RTR, L. Livers

Adina puspè èn ils pledaders vegnids interruts cun dumondas e pretensiuns dals possessurs da chasas da vacanzas. Ils preschents han adina puspè insistì sin la dumonda: «Quants daners dapli vegnan incassads?» e «Pertge vegnan quels daners duvrads?»

Surfatscha n'è betg anc enconuschenta

Dumondas ch’ils responsabels n’han betg pudì respunder exact, perquai ch’i n’è betg anc enconuschent quanta surfatscha che tut las abitaziuns da vacanzas en quella regiun han. Ils pajaments dentant vegnan fatgs cun ina clav che pretenda che mintga possessur paja 9 francs il meter quadrat ed ina pauschala da 220 francs.

Tenor emprimas stimaziuns quintan ils responsabels cun var 1 milliun francs en cassa – quai che fiss var 300’000 francs dapli che cun la lescha da taxas veglia.

Orientaziun sur Pasca

Ils possessurs da chasas da vacanzas a Mustér èn vegnids orientads sur Pasca da las novas taxas turisticas che valan en la regiun. Envidà a quella orientaziun han la vischnanca, las pendicularas, l’uniun da commerzi da Mustér e l’uniun Sedrun Mustér turissem: quai sin giavischs dals possessur da chasas da vacanzas.