Giacometti porta 3,5 milliuns

Il tripticon da Giacometti dal Waldhaus a Flem è vendì ad in cumprader svizer per 3,5 milliuns francs.

Il tripticon.

Legenda da maletgs: Il tripticon «Panorama da Flem» è vendì. RTR

Il tripticon «Panorama da Flem» è vegnì cumprà il venderdi suentermezdi a Turitg dad in cumprader anc nun-enconuschent per 3,5 milliuns francs. Tenor l'aucziunader è il cumprader in collecziunader d'art svizzer che vul far accesibel il tripticon era en l'avegnir ina u l'autra giada a la publicitad.

In giuvel dal hotel Waldhaus

L'ovra «Panorama da Flem» era in dals giuvels en il Hotel Waldhaus a Flem. Ella era vegnda stgaffida da Giovanni Giacometti l'onn 1903 sin incumbensa dal directur da l'hotel da quella giada J.F.Walther. Ella era en il posses dal hotel fin uss. Curt suenter che la firma americana Z Capital Partners aveva cumprà il Waldhaus il december 2015 era vegnì enconuschent ch'il tritpicon duai vegnir vendì.

Buna fatschenta per la chasa d’aucziun

Cun la vendita dal panorama da Flem ha era la chasa d’aucziun fatg ina buna fatschenta. Ultra dals 3,5 milliuns francs che la possessura dal Waldhaus ed uschia era dal maletg, la Z Capital Partners, survegn, sto il cumprader anc pajar rodund 15% dal pretsch da cumpra a la chasa d’aucziun. Quai èn tenor il directur da la chasa d'aucziun Koller, Cyril Koller, circa 500’000 francs. Uschia munta il pretsch total da pajar per il maletg a sur 4 milliuns francs. Ed en quella summa è la taglia sin la plivalur anc betg includida.

RR novitads 18:00