L'hotel da quatter stailas, La Val a Breil, mida puspè direcziun. Puspè ston ins dir, perquai che la stad vargada ha il pèr Chris e Susan Faber decidì – suenter avair manà 7 onns l'hotel – da bandunar Breil e da surpigliar in Hotel a Gonten en il chantun Appenzell dadens. Sco successurs èn vegnids preschentads Marcel e Cornelia David. Lez han dentant gia avunda e puspè dà giu la plazza, suenter gnanc in onn sco directurs.Per Jon Clalüna, il president dal cussegl d'administraziun da la Breil Gastro SA – la possessura da l'hotel La Val, è quai stà ina surpraisa. Marcel e Cornelia David na sajan betg sa sentids bain en ina regiun da muntogna en la periferia, e quai haja manà a quella decisiun persunala.
Tim Bennewitz e Chris Wieghardt novs directurs
Remplazzà vegn il pèr da direcziun cun dus co-directurs, Tim Bennewitz e Chris Wieghardt. Omaduas han lavurà il davos en l'hotel Waldhaus a Flem e surpiglian per l'emprima giada la direcziun d'in hotel. Davent dals 15 da zercladur èn els responsabels per l'hotel La Val.
Project d'engrondiment
Jon Clalüna ha era confermà in project d'engrondiment da ca. 8 milliuns francs. Planisà è in nov bajetg cun 24 suitas, situà vis-à-vis da l'hotel existent. La vischnanca haja gist dà la lubientscha per quai project. Ils detagls na sajan dentant anc betg planisads ed era il termin da l'emprima badigliada na saja anc betg definì.
RR actualitad 17:00