Siglir tar il cuntegn
cuntegn

Surselva Futur intschert per vischnancas da concessiun

Il pretsch bass d’electricitad e l’avegnir intschert dal tschains d’aua èn in problem per las vischnancas da concessiun.

Il lai da fermada da Nalps.
Legenda: Il lai da fermada da Nalps. Keystone

La situaziun actuala sin la fiera d’energia cun in pretsch d’electricitad fitg bass n’è betg mo in problem per las interpresas che produceschan energia. Era las vischnancas che profiteschan da la vendita da l’aua han damain entradas.

Trun perda 2 milliuns francs

La vischnanca da Trun per exempel ha recaltgà davent dal 2010 fin ils 2014 circa 2,2 milliuns francs per onn ord la vendita da energia da participaziun. L'entschatta dal 2015 hai dà in nov contract da vendita cun l’Ovra electrica Rain Anteriur SA, dentant cun in pretsch fixà bler pli bass. Entras quai perda Trun radund 2 milliuns francs entradas per onn.

Il president communal da Trun Dumeni Tomaschett.
Legenda: Il president communal da Trun Dumeni Tomaschett. RTR

Tschains d’aua pli impurtant

Tenor il president communal da Trun Dumeni Tomaschett èn quels 2 milliuns francs ad on che mancan betg in problem. Quai saja stà in contract che haja purtà durant 5 onns ina summa nunspetgada, ch’els hajan duvrà per amortisar pliras investiziuns da la vischnanca sco p.ex. la chasa da scola, la scoletta e la chasa communala.

Novs projects na sajan betg vegnids finanziads cun da quels daners. Pli impurtant sajan per Trun las entradas annualas dals tschains d’aua. Quels muntan a total passa 700’000 francs ed èn gia dapi blers onns ina part fixa dal preventiv. La lescha da tschains d’aua vertenta scada fin 2019. Ina nova lescha che definescha il mecanissem per calcular il tschains d’aua n’è dentant anc betg sin maisa. I n'è pia betg cler co che la situaziun finanziala da las vischnancas da concessiun vegn ad esser a partir dal 2020.

Tschains fix u variabel?

La discussiun politica davart in nov mecanissem per il tschains d’aua è anc giuvna e las posiziuns da las ovras electricas e da las vischnancas ed ils chantuns èn anc fitg differentas. Ellas tanschan davent da stritgar cumplettamain il tschains d’aua enfin mantegnair il status quo.

Per ils producents d’energia èsi impurtant ch’il tschains na saja betg definì fix sur la prestaziun pussaivla d’ina ovra electrica, mabain ch’el vegnia calculà sin basa da la situaziun sin la fiera. Las vischnancas ed ils chantuns che vendan aua per la producziun d’electricitad na pon dentant betg desister da quellas entradas. Senza in tschains d’aua avessan bleras vischnancas da concessiun gronds problems.

Fadri Ramming, il secretari general da la conferenza da las regenzas dals cantuns alpins.
Legenda: Fadri Ramming, il secretari general da la conferenza da las regenzas dals cantuns alpins. RTR, P. Collet

Tendenza: basa fixa e supplement variabel

Il secretari general da la conferenza da las regenzas dals chantuns alpins, Fadri Ramming, cumbatta a Berna per ils interess da las vischnancas da concessiun.

Tenor el vegn discurrì davart in sistem da tschains d’aua cun ina basa fixa ed in supplement che variescha tut tenor la situaziun da la fiera. Uschia avessan las vischnancas vinavant ina entrada fixa per il preventiv ed ils producents d’electricitad na stuessan betg pajar medem bler tschains en temps, cura ch’il pretsch d’electricitad è fitg bass.

RR actualitad 17:00