Siglir tar il cuntegn

Header

Navigaziun

La baselgia catolica da Breil.
Legenda: La baselgia catolica da Breil. RTR, M. Demont
cuntegn

Surselva Fusiun da las plaivs catolicas Breil, Dardin e Danis/Tavanasa

La davosa fin d’emna han las 3 plaivs catolicas da Breil, Dardin e Danis/Tavanasa decis da fusiunar sin ils 1 da schaner 2016.

La decisiun da fusiunar sin ils 1 da schaner 2016 è succedida en tuttas 3 plaivs unanimamain. Las 3 plaivs han gia dapi plirs onns la medema suprastanza e la medema constituziun, uschia che la fusiun n’è betg stada in punct che ha procurà per bleras discussiuns.

Fusiun cunzunt pervia da las finanzas

Tenor il president actual da las plaivs Sep Cathomas, saja la decisiun da fusiunar cunzunt stada ina decisiun en favur da las finanzas. Tenor il reglament da contribuziun a fusiuns da la baselgia catolica dal chantun Grischun vegnan fusiuns da plaivs sustegnidas finanzialmain. Ella paja 10’000 francs per mintga plaiv che fusiunescha e 400 francs per mintga commember enfin maximal 1’000 persunas. Uschia quinta Sep Cathomas cun in sustegn finanzial da la fusiun entras la baselgia catolica chantunala da radund 430’000 francs.

Radunanza constitutiva mez november

Sco proxim sto il contract da fusiun vegnir acceptà da la cumissiun administrativa da la baselgia chantunala. La radunanza da constituziun da la nova plaiv è planisada per il mez november. Enfin ils 1 da schaner 2016 furma la suprastanza da las 3 plaivs ina suprastanza transitorica che prepara la fusiun.