Fugitivs en claustra da Glion

Las mungias dominicanas da la claustra da Glion han prendì si ina famiglia da fugitivs da la Siria.

La claustra da las dominicanas da Glion agl ur dal guaud

Legenda da maletgs: Ils fugitivs sa chattan en la chasa da sentupada da la claustra da Glion. RTR, L. Livers

Quella famiglia po far part dad in'acziun umanitara ch'il Cussegl federal ha decidì il mars 2015. Quell'acziun umanitara prevesa da prender si 3’000 persunas ch'èn spezialmain periclitadas, e quai cun ina procedura d'asil speziala. Els survegnan il status da fugitivs da la UNHCR, e quai gia en ils camps da fugitivs en il Libanon. Da là davent vegnan els directamain en Svizra.

Sora Madlen Büttler e gist vit il telefon en ses biro da la claustra da Glion

Legenda da maletgs: La famiglia da la Siria porta bler plaschair en claustra, di Sora Madlen Büttler. RTR, C. Albin

Enstagl dad ir en in center per requirents d'asil en Svizra, èn els vegnids directamain tar l‘agid social ch'è da sia vart responsabel per l'integraziun da questa famiglia. Da quels 3’000 che pon far part da quell'acziun umanitara vegnan var 70 el Grischun, di Claudia Tomaschett, la manadra da l’uffizi social da la Surselva.

L’emprima famiglia ch'è directamain renconuschida sco fugitivs èn in bab, ina mamma e 3 uffants da la Siria. Dapi 4 onns èn els sin fugia, e dapi 8 dis èn els a Glion en claustra tar las mungias dominicanas. En claustra pon els restar fin che l’uffizi social ha sclerì tut las chaussas ch’i dovra. Ins quinta che quai dovria var 8 emnas.