Siglir tar il cuntegn
Inhalt

Surselva Franz Gschwend è dapi 100 dis president communal da Laax

En quests 100 dis ha Franz Gschwend gia vis bleras fassettas da quest uffizi.

Franz Gschwend, il president communal da Laax.
Legenda: Franz Gschwend, il president communal da Laax. RTR, H. Giger

Strusch in mais suenter che Franz Gschwend aveva surpiglià l’uffizi sco president communal da Laax, è el stà l'emprima giada en il center da l’interess public. Numnadamain suenter l'accident tragic, cura ch'ina vatga mamma ha attatgà e blessà mortalmain ina turista sin il territori da Laax. Cun excepziun da quest accident sajan ils emprims 3 mais sco president cunzunt stads in temps per emprender d'enconuscher la suprastanza ed ils emploiads da la vischnanca.

Distgargiar suprastanza da lavurs administrativas

Durant quest temp ha Franz Gschwend era gia empruvà da distgargiar la suprastanza d'incumbensas administrativas. La suprastanza stoppia avair il spazi per planisar il futur da Laax, per studegiar nua e co ch'els duajan prender influenza sin il svilup da Laax.

Sectur da construcziun e fusiuns

Temas impurtants dals proxims onns sajan il sectur da bajegiar ed eventualas fusiuns da vischnancas. Anc hajan ils impressaris a Laax avunda lavur cun las abitaziuns secundaras che possian anc vegnir bajegiadas. En ils proxims 2 onns stoppian ils impressaris dentant midar strategia.
Era ina fusiun da Laax cun ina da las vischnancas vischinas Falera, Sagogn ni Schluein saja in tema. Il squitsch da fusiunar na saja anc betg dà, i vegnia dentant gia discutà sur da talas ideas. L'impuls da lantschar ina fusiun stoppia dentant vegnir da la populaziun.