Siglir tar il cuntegn
cuntegn

Surselva Formaziun da basa ubain ina sort patenta per ustiers

Quai ha deputà Franz Sepp Caluori da la PCD Cuira pretendì en in'incumbensa a la regenza. Sia incumbensa ha dentant fatg naufragi.

Franz Sepp Caluori
Legenda: Franz Sepp Caluori è dapi in onn persident da GastroGrischun - sia incumbensa ha fatg naufragi. RTR, G. Hosang

Cun 60 tar 44 vuschs han ils deputads e las deputadas dal Cussegl grond sbittà la moziun da Caluori.

Ils arguments principals cunter ina patenta da basa èn stads: che la qualitad da la gastronomia dependia betg dad ina scolaziun da basa. Ultra da quai pretendia il chantun Grischun da mintga ustier ina concessiun e quella survegnian be persunas che sappian garantir ina irreproschabla direcziun dal manaschi. Er han ils deputads da las regiuns exprimì lur dubis ch’i saja gia senza patenta grev da chattar ustiers per las ustarias en ils vitgs.

Preschentà l'incumbensa gia l'entschatta avrigl

Ils 4 d'avrigl suentermezdi è stà a Mustér la radunanza da delegads da la GastroGrischun – l’uniun grischuna d'ustiers e hoteliers. Enturn 120 persunas èn stadas preschentas. Durant la radunanza ha il president Franz Sepp Caluori era tematisà sia incumbensa a la regenza grischuna concernent ina meglra scolaziun per ina gastronomia variada e che funcziuna bain. L’incumbensa pretenda ch’i vegnia fatg ina midada vid la lescha d’ustarias grischuna. Quella duai pretender da mintgin che vul avrir in manaschi gastronomic da demussar, ch'el haja la savida fundamentala ch'i dovra per manar in manaschi gastronomic.

Curs fundamental per ustieras ed ustiers

Dapi 1998 è quai numnadamain betg necessari en il Grischun. Avant stuevan in ustier far la patenta d’ustiers che cuzzava 14 emnas avant ch’el survegniva la lubientscha d’avrir in manaschi gastronomic. Franz Sepp Caluori na vul dentant betg reintroducir la patenta d’ustier. El vul l'introducziun d'in curs fundamental da 10 fin 15 dis. En quest curs duain ils futurs ustiers survegnir la savida fundamentala pertutgant las pretensiuns d'igiena, il dretg da lavur, il dretg davart la taglia sin la pli valur e la segirtad da lavur.

Regenza propona da refusar incumbensa

Tut auter tuni da la regenza. Lezza argumentescha ch'ins n’haja betg pudì constatar in svilup negativ en la gastronomia dapi ch'i na dettia betg pli la patenta d'ustiers e ch'i dettia gia avunda leschas che lubeschian d'agir immediat en situaziuns privlusas. Perquai na dovria quai betg novas perscripziuns che sajan gnanc necessarias. Perquai propona la regenza al parlament da na betg acceptar l’incumbensa.