Ina smartflower è in indriz che sa mova suenter il sulegl, sco las flurs. Uschia è l'angul da las cellas solaras adina optimal en la posiziun dal sulegl per la producziun d'energia. Cura ch'il sistem na po betg producir energia sa serra la flura ch'ha in diameter da radund 5 meters.
Ina tala flur avess era Victor Candinas da Mustér gugent mess en ses curtin. La vischnanca n'ha dentant betg dà la lubientscha persuenter ed ha instradà ina zona da planisaziun per pudair ponderar aifer la revisiun da la planisaziun locala, co tractar tals stabiliments. Quella blochescha tals indrizs per almain dus onns. Per Victor Candinas è questa decisiun nunchapibla. La finala veglia el investir var 20'000 francs per far energia regenerabla, quai che la Confederaziun sustegn e giavischa. Sco retschertgas da RTR han mussà, n'è Mustér dentant betg la suletta vischnanca en il Grischun che na lubescha betg flurs solaras.
Bleras flurs solaras n'è betg bel
La vischnanca da Mustér tema che sch'ins lubeschia ina giada in tal indriz, stoppian ins era lubir ad auters tals, e tuttenina hajan ins forsa en in quartier plirs da quests indrizs e quai na saja betg estetic, manegia il president communal Robert Cajacob. Sistems convenziunals sin tetgs e vid fatschadas na sajan dentant betg tangads da questa procedura.
Solar sin tetg n'ha betg cuntentà
L'emprima idea da Victor Candinas è stada da metter in sistem convenziunal da solar sin tetg. Per far quai avess el bugen drizzà l'ala tetg da la chasa tenor il sulegl. Quai n'è dentant pervi dal plan da quartier betg stà pussaivel. Sco el di, veglia el far electricitad cunzunt l'enviern, cura ch'el dovria blera. Avunda energia possia el dentant be producir sche l'ala tetg guardia vers sid. Perquai che quai n'è dentant betg stà pussaivel ha el laschà d'installar in implant solar sin tetg e tschertgà in'autra soluziun.
Ussa hai num da spetgar fin che la politica ha decidì co vinavant cun indrizs solars, quai schabegia dentant il pli baud en dus onns.
RR actualitad 12:00