En il Calender Romontsch haja Florentina Camartin vulì tractar divers temas sco professiuns, politica, cretta, persunas che vivan en l’exteriur (che sajan abunents fidaivels) ubain fatgs ed istorgias da temps passads.
E sch’ella tschertgava insatgi per scriver sur da professiuns schevan quels tals magari na, tschertga insatgi auter ubain ch’els schevan «Jau na sai betg scriver». Alura scheva ella, ch’els possian far quai ensemen, ella fetschia in'intervista. I dettia pliras modas per preschentar ina professiun.
Vacanzas mo il schaner e favrer
Florentina Camartin di, ch’ella veva blera lavur sco redactura. Ella veva il sentiment, ch’ella haja vacanzas il schaner e favrer, mo suenter stueva ella gia far puspè in concept, tschertgar glieud che scriva e la finala, cura ch’ils texts e las illustraziuns eran rimnads, mirar che tut giaja bain en pagina. Fin l’avust stueva ella avair ensemen il material.
Midà il format
Cura ch’ella è daventada redactura ha Flornetina Camartin midà il format dal Calender Romontsch sin A5. Sia emprima ediziun saja stada la 151avla, e perquai haja ella manegià, che quai fiss il dretg mument per midar il format. Il Calender en sia furma tradiziunala pareva ad ella memia gross e pitschen per pudair far ina bella preschentaziun sco ella vuleva.
Ultra da quai haja ella vulì adattar il format als formats che vegnan duvrads en stamparia. Ma ella n'haja betg vulì trumpar ad insatgi ubain far sco sche tut vegnia meglier uss.
Per far chapir lecturas e lecturs questa decisiun haja ella mess en l’ediziun 151 il verset:
Appreziescha e tegn en onur tut il prestà, mo avra tes cor amicablamain era per il nov e nunusità.
Sa chapescha che las reacziuns èn stadas differentas: Ils ins hajan beneventà la midada, auters hajan gì l’emprim resalvas.
Problems cun la vesida
Ussa, cun 73 onns, vul Florentina Camartin dar questa incumbensa en mauns pli giuvens. Las forzas laschian suenter ed ella haja problems cun la vesida. Mo sch’ella mira enavos di ella, ch’ella haja fatg questa lavur cun grond plaschair.