Siglir tar il cuntegn
Inhalt

Surselva Flem: Vitg da palissadas enstagl da center da sport

La suprastanza communala ha proponì da spazzar il center da sport Prau la Selva e da bajegiar en quai lieu in nov ressort da vacanzas, in ressort cun 56 chamonas en il stil da palissadas a l'ur d'in lai artifizial.

Legende: Video Flem: nov resort da vacanzas abspielen. Laufzeit 03:11 Minuten.
Or da Telesguard dals 12.12.2017.

Il glindesdi saira ha la suprastanza da la vischnanca da Flem preschentà a la radunanza communala l'idea da remplazzar il center da sport Prau la Selva cun in nov ressort da vacanzas. Ils davos onns ha la vischnanca adina stuì surpigliar il deficit dal center da sport. Quel ha muntà mintgamai a ca. 250'000 francs per onn. Ina gruppa da project ha examinà pliras variantas co midar il center da sport, è dentant vegnida a la conclusiun, ch'in center da sport a Flem na possia betg vegnir manà cun cuvrir tut ils custs.

Il center da sport Prau la Selva a Flem.
Legenda: Il center da sport Prau la Selva a Flem. flims.com

Vitg da palissadas

Il project preschentà prevesa la construcziun d'in lai artifizial cun duas pitschnas inslas en il lieu dal center da sport. Enturn quai lai sin la riva duain vegnir construidas 56 chamonas da lain en il stil da palissadas per 2 enfin 8 persunas (total 234 letgs). Plinavant èn planisads in restaurant cun butia, dus bajetgs per sedutas u seminaris, ina sauna ed ina scolina da guaud. En il ressort duai il giast sa sentir sco entamez la natira.

32 milliuns

Ils custs totals muntan a ca. 32 milliuns francs. Actual è la gruppa da project a la tschertga d'in investider privat che finanziass il project. La planisaziun da termins prevesa, da chattar in tal investider enfin la stad 2018. L'entschatta da las lavurs da construcziun è planisada la stad 2019 ed il ressort duai vegnir averts in onn pli tard, la stad 2020.

RR actualitad 07:00


Ord l'archiv