Danovamain refusa il suveran da Flem da remplazzar l'ustaria a la riva dal Lag la Cauma cun in bajetg nov. Cun 53,9% (463 vuschs Na, cunter 396 vuschs Gea) han las votantas ed ils votants bittà il project da 6,5 milliuns francs. I fiss stà previs ina ustaria nova en furma da cubus sin trais auzadas. La participaziun a la votaziun ha muntà a 46,6%.
Il president communal, Adrian Steiger po sulet supponer las raschuns per il Na. Tenor el haja forsa dà memia bleras dumondas anc avertas. Er sche la ustaria al Lag la Cauma na vegn il mument betg remplazzada cun in bajetg nov, na stoppian ins anc betg serrar il manaschi, di il president communal envers RTR.
Ord l'archiv
Gia dus auters projects per remplazzar l'actuala ustaria al Lag la Cauma avevan fatg naufragi. Tant il 1997 sco era il 2003 avevan ils da Flem ditg Na. Ils 21 d'october 2019 ha la vischnanca preschentà a la populaziun in terz project per remplazzar l'ustaria a l'ur dal Lag la Cauma. Per ils plans da la nova ustaria segna l'architecta Corinna Menn.
RTR novitads 11:00