Siglir tar il cuntegn

Surselva Flem: Halla da curling averta la stagiun d’enviern 2016/17

Suenter che la Z Capital Group ha cumprà il hotel Waldhaus n’eri betg segir sche la halla da curling vegnia puspè averta. Uss èsi cler: sco la stagiun d’enviern passada surpiglia la Flims Curling & Events ScRL il manaschi da la halla da curling era per la proxima stagiun d’enviern.

Heiner Hochreutener (san.) ed Edi Crameri, il president dal club da curling, sa legran sin la nova stagiun da curling a Flem.
Legenda: Heiner Hochreutener (san.) ed Edi Crameri, il president dal club da curling, sa legran sin la nova stagiun da curling a Flem. RTR, C. Albin

Sco il maina fatschenta da la Flims Curling & Events ScRL Heiner Hochreutener ha confirmà a RTR, vegnan els puspè a surpigliar il manaschi da la halla per la stagiun d’enviern 2016/17. Suenter che la Z Capital Group ha cumprà il hotel Waldhaus n’eri betg segir sche la halla da curling vegnia puspè averta.

La nova possessura dal hotel aveva communitgà, ch’ella veglia vender la halla da curling e sa concentrar sin il hotel. Perquai n'ha ella era ditg betg vulì bloccar la halla cun suttascriver in contract da locaziun cun ina societad gestiunaria.

Quai avess numnadamain bloccà la vendita da la halla. Uss para quai dentant da dar ina soluziun, uschia ch’i vegn vinavant ad esser pussibel da pratitgar quai sport a Flem. La halla avra sias portas ils 28 da settember e la stagiun vegn a cuzzar enfin mez avrigl 2017.

Che la halla da curling vegn puspè averta proxim enviern munta era, ch'il campiunadi svizzer da curling il favrer 2017 po vegnir manà tras a Flem. Il Club da curling Flem ha gia survegnì l'entschatta da l’onn l'incumbensa da l’Associaziun svizra da curling d'organisar quai turnier. Perquai ch'i n’era dentant betg clar co i giaja vinavant cun la halla, n’era i er betg segir ch'il campiunadi possia vegnir manà tras a Flem.


Ord l'archiv:

Legende: Video Telesguard 24-10-2009 - Avertura nova halla da curling a Flem abspielen. Laufzeit 03:20 Minuten.
Or da RTR dals 24.08.2016.