Ina part da questas rollas da film ha la fundaziun entant gia restaurà e digitalisà. Ils films mussan la vita dal mintgadi dals onns 1920 en Lumnezia. I sa tracta d'ina raritad perquai ch'ins aveva da lezzas uras uschiglio plitost filmà en regiuns turisticas. Quai per motivs da reclama. Maletgs dal mintgadi en regiuns pauc turisticas èn rars.
Bova da Zignau (1927)
Sper impressiuns dal mintgadi e da lavurs – sco per exempel ir a guaud, ina processiun ubain ina mastralia – èn er maletgs da la bova da Zignau dal onn 1927 sin las rollas da film. Da la bova existan gia fotografias, il film resplendia però meglier la realitad, dian ils experts.
L'um da camera: Gion Peter Casanova
Cun gronda probabilitad ha Gion Peter Casanova, oriund da Vrin, filmà quest material. L'onn 1913 è el emigrà cun ses frar vegl en l'America. Là ha el lura era lavurà sco um da camera. Durant sias vacanzas en sia patria filmava el lura la vita da mintgadi en Surselva. Spezial è er ch'el ha filmà tut sin il format da 35mm, pia in format char e da fitg buna qualitad.
TR Telesguard 17:40
