Siglir tar il cuntegn
Inhalt

Surselva «Fegl ufficial Surselva» uss era en furma digitala

La Regiun Surselva ch'edescha il «Fegl ufficial Surselva» ha decidì da porscher quel era en moda digitala. La raschun èn cunzunt ils possessurs d'abitaziuns secundaras.

Il «Fegl ufficial Surselva» datti uss era digital.
Legenda: Il «Fegl ufficial Surselva» datti uss era digital. RTR, Gion Hosang

Il giavisch da pudair porscher a possessurs d'abitaziuns secundaras il «Fegl ufficial Surselva» saja vegnì d'intginas vischnancas, declera il manader da fatschenta da la Regiun Surselva, Duri Blumenthal. La soluziun la pli simpla saja stada da porscher la pussaivladad d'annunziar l'abunament online e lura trametter a quests l'entir «Fegl ufficial Surselva» en furma electronica.

Questa soluziun gida dentant mo tar las vischnancas nua che las publicaziuns èn bilinguas. Duri Blumenthal manegia dentant che là nua che la lingua uffiziala saja il rumantsch, saja quai simplamain uschia. Sch'ins giaja a New York saja era tut englais. Da l'autra vart dettia quai vischnancas che publitgeschian infurmaziuns che pertutgan era possessurs d'abitaziuns secundaras en duas linguas ed i dettia era tals che chapeschian in pau il rumantsch.

Pitschens custs

Abolir il fegl uffizial sin palpiri na vegnia dentant betg en dumonda, declera Duri Blumenthal. La conferenza dals presidents haja bain discutà quai, dentant sajan ins vegnì a la conclusiun ch'i dettia blera glieud che apprezieschia anc adina la furma analoga sin palpiri.

Sco Duri Blumenthal ha ditg, chaschunia la purschida betg uschè gronds custs per la Regiun Surselva. Endrizzar l'entir sistem custia tranter 10'000 e 15'000 francs. Ils custs annuals sajan sut 10'000 francs. Ils custs surpiglia la Regiun Surselva sezza. Ils custs per la producziun dal «Fegl ufficial Surselva» sin palpiri pajan las vischnancas. Vid quai è nagut sa midà.

RR actualitad 12:00