Tratgas indigenas en nov vestgì / Einheimische Gerichte anders präsentiert – uschia sa numna il cudesch da cuschinar da Fatmir Spescha. El è oriund dal Cosovo e stat cun sia famiglia a Danis. Dapi 2018 è el il manader da gastronomia en il center da sanadad Puntreis. Ultimamain è ses cudesch vegnì preschentà ad ina vernissascha.
30 recepts
Il cudesch cuntegn 30 recepts da schuppas, avantpasts, spaisas principalas e desserts, per ex. schuppa da paun cun fain selvadi e lain schember, egls bov cun ivettas e vin cotschen ubain raviolis da capuns – quei ch'è la spaisa preferida da Fatmir Spescha. Impurtant saja ch’ins percorschia ch’i sajan capuns, di il cuschinier creativ che ha survegnì il 2019 puncts da Gault Millau.
Cussadentas e cussadents prefereschan spaisas ch'els enconuschan
Il cudesch haja el scrit suenter ils discurs cun las senioras dal center da sanadad Puntreis. Las ideas da variar las spaisas vegnian savens la notg. El nizzegia era sia savida dad autras cuschinas, u da la Germania nua ch’el ha lavurà plirs onns, ubain da sia patria, il Cosovo. Fatmir Spescha conceda dentant che cussadentas e cussadents prefereschian las spaisas ch’els enconuschian.
Variaziuns per la vernissascha
Era a la vernissascha da ses cudesch han el e sias collavuraturas e collavuraturs (en tut 12) creà set spaisas plain fantasia. Uschia èsi vegnì servì la schuppa da zitga en ina crosa dad ovs ubain ina decoraziun che Spescha numna Corallas. Quellas ha el brassà en la chazzetta cun farina, ieli, aua e suc da rischcotschnas – in’omeletta fitg fitg fina.