Siglir tar il cuntegn

Header

cuntegn

Surselva Fatg bunas experientschas cun ses asens

Avant otg onns è il pur da Madernal, Valentin Bisquolm, che stat uss a Mustér sa decidì da tegnair asens. Uss ha el 30 chaus, ma cun la fin da l’onn vul el surdar il manaschi puril ad in giuven da Sumvitg.

Luf-tscherver ha stgarpà nursas

Valentin Bisquolm raquinta ch’el haja gì problems cun las nursas ils ultims onns. Il luf-tscherver aveva stgarpà duas. Mo dapi ch’el haja gì ils asens haja el gì nagins donns pli vid las nursas. Ed in avantatg saja stà che quests animals maglian giu plauncas e mises.

audio
Mezdi: Valentin Bisquolm ha fatg bunas experientschas cun ses asens
ord Actualitad dals 06.12.2017.
laschar ir. Durada: 2 minutas 54 Secundas.

In animal simpel

A l’entschatta ha el gì trais asens. A l’emprim ch'è naschì ha el dà il num Josef, perquai ch’el era naschì ils 19 da mars, l’anniversari dal sontg. L’asen saja in animal simpel e na dettia betg tanta lavur sco la nursa, per ex. cura ch’ins stoppia far saivs. Ed el haja adina puspè pudì vender in u l’auter.

Attracziun per ils uffants

Tschertgads èn ils asens era mintgamai da Son Niclà. La giuventetgna da Mustér haja gia dumandà, sch’ella possia emprestar in u dus. Ed el haja era gia fatg Son Niclà ubain in famegl. Dacurt sajan els stà cun ils uffants ed ils asens cun stgellinas en in guaud. Quai saja stà ina gronda attracziun per ils uffants pitschens, ed el pondereschia da cuntinuar cun quest usit, perquai ch’el giaja vers la pensiun, di Valentin Bisquolm.

Animal fitg intelligent

Quai ch’è era da dir sur da quest animal: El saja fitg intelligent, e co ti tractas el tracta el era tai, di il pur. Forsa fetschian ins entiert sch’ins discurria dad asens cun stgellas, far ubain esser in asen. L’asen saja in animal che possia era dar a ti charezza ed el haja gì ed haja anc adina gronda simpatia per quest animal.

RR actualitad 11:00

Artitgels legids il pli savens