Siglir tar il cuntegn
cuntegn

Surselva Far sez l’aissa da surf ord lain

La mar e lunsch davent da Falera e tuttina vegn fatg e mussà co ins fa aissas da surf e quai ord lain.

Legenda: Guardar il video Aissas da surf «made in Surselva». Durada 02:49 minutas.
Or da Telesguard dals 23.05.2016.

Sch’ins saja en in bel lieu, lura hajan ins era l’inspiraziun per far insatge bel, di Urs Welti che fabritgescha cun ses cumpogn Ben Chick aissas da surf ord lain a Falera. Els en omadus passiunads surfists ed èn independent in da l’auter vegnids sin l’idea da fabritgar sez lur aissa.

Las aissas da surf en il panorama da Falera.RTR, G. Hosang

Communablamain han els fundà la ENLAIN Factory a Falera. Cun empruvar ora hajan els lura perfecziunà lur metoda da far aissas da surf.

Far sia atgna aissa da surf

Perquai ch’i saja ina experientscha tut speziala da construir sez l’aissa, porschan els a Falera en la resgia veglia curs per in e mintgin. Aifer quatter dis vegnan ils participants da construir ina aissa da surf. Tenor Urs Welti na dovria quai naginas abilitads spezialas.

Els gidian là nua ch’i fetschia basegn e sustegnian ils participants, uschia che l’assa grategia era. Tscherts pass da lavur vegnan preparads u fatgs per ils participants.

Far sez in’aissa da surf e suenter star sez sin la mar cun questa, è in sentiment ch’ins na po betg descriver.
Autur: Urs Welti

Betg mo aissas da surf

Viver dal far e vender aissas da surf na pon Ben Chick ed Urs Welti betg. Quai na saja era betg la finamira primara. I dat dentant gia plans per schlargiar la paletta da products. Uschia vegn actualmain empruvà ora co i va il meglier da producir skis e snowboards.

Sco Urs Welti di, duessi dar l’enviern proxim ils emprims curs per far ils agens skis ubain, l’agen snowboard.