Siglir tar il cuntegn

Surselva ex18: Giuvenils duain turnar en la regiun

Bleras giuvnas e giuvens da la Surselva van a studegiar en la Bassa. Mo il pli paucs turnan. La ex18, l’exposiziun da commerzi e professiun a Mustér, vul empruvar da midar questa situaziun.

Avis a la concurrenza per giuvenils
Legenda: Avis a la concurrenza per giuvenils Ex18

Ils organisaturs da la ex18, l’exposiziun da commerzi e professiun a Mustér, vulan lantschar ina concurrenza per giuvenils. Cun quella idea vulan els promover l’economia, crear novas plazzas e mantegnair il commerzi en la regiun. La finamira saja da carmalar enavos giuvnas e giuvens Sursilvans che studegian en la Bassa, di la presidenta dal comité d’organisaziun da la ex18 Rita Huonder.

Perquai sajan els en contact cun il gimnasi da Mustér, cun las scolas a Glion ubain cun la Scol’auta per tecnica ed economia a Cuira ed era cun l’Universitad da Sogn Gagl. Perquai ch’il Forum Surselva è era preschents a la ex18 saja quai ina buna chaschun per ils giuvenils da tgirar contacts.

Project cuntinuescha

A la ex18 pon ils giuvenils preschentar lur projects sin ils stans. E la finala datti premis per las 10 meglras soluziuns da la concurrenza. Cun quai na saja questa idea però betg finida, di Rita Huonder. Il schaner dettia ina concurrenza supplementara en la sala Peter Kaiser sin claustra e suenter vegnian quels projects cuntinuads a las proximas exposiziuns da commerzi e professiun a Mustér.

Fin uss 74 expositurs

La ex18 è dals 26 fin ils 28 d’october en il Center da sport e cultura. Fin uss èn 74 expositurs s’annunziads. Ins quinta cun 9’000 fin 10’000 visitaders. I dat era in program da divertiment cun musica da la gruppa acapella «a-live" e cun ils acrobats da gimnastica «Seppäs». Plinavant vegn il film «Amur senza fin» mussà.

Fabrica da patratgs

La presidenta da la ex18 ha preschentà il program sonda passada a la radunanza generala da l’uniun da commerzi e professiun Mustér UCP. En ses rapport ha il president da la UCP Edgar Durschei menziunà ch’i saja stà difficil da tschertgar las persunas che èn uss al timun da la ex18. Auters temas ch’el ha tractà èn ch’ins ha fundà la gruppa: «fabrica da patratgs» che sa fatschenta cun l’avegnir da Mustér, che l’uniun ha edì in magazin e creà ina tastga per far cumissiuns, ina tastga cun in maletg dad ina vatga en alv e blau (quella è quasi il mascottin da Mustèr).

Vendita communabla

Ina idea per il 2018 è che las fatschentas a Mustér organiseschan ils 16 da december ina vendita communabla. Alura vul ins era edir in segund magazin cun purtrets da las fatschentas indigenas etc.

Sco nova actuara da l’uniun da commerzi e professiun Mustér è Andrea Hosang vegnida elegida (ella succeda ad Adrian Deflorin). Il responsabel per il magazin è Hans Huonder.

RR novitads 06:00