Siglir tar il cuntegn
cuntegn

Surselva Ervin Jacomet: «24 uras pli tard è la bova vegnida en quest lieu»

Sper il Piz Cengalo, dal qual pliras bovas èn sa distatgadas ultimamain, è il Piz Badile ch’è fitg renumà per far turas. Uschia è il guid da muntogna Ervin Jacomet stà en la Val Bondasca per ascender quest piz curt avant las bovas.

Legenda: Guardar il video Ervin Jacomet e si’experientscha a Bondo curt avant la bova. Durada 03:09 minutas.
Or da Telesguard dals 07.09.2017.

Be 24 uras avant la bova è Ervin Jacomet stà en la Val Bondasca nua che la bova e vegnida atras. El haja gì dad ir cun ses client en la val per l’auto. Dus dis avant èn els numnadamain vegnids da la val en fin a Laret. Da là èn ils dus alpinists ids fin tar la chamona Sasc-Furä ed èn lura ascendids il di suenter sin il Piz Badile ed ids da l’autra vart engiu en l’Italia.

Il patratg, ch’els sajan stads be curt avant en in lieu ch'è vegnì tschiffà da la bova fetschia pel giaglina. Schegea ch’el haja propi realisà pir in pèr dis pli tard tge fortuna ch’els hajan gì, declera Ervin Jacoment vinavant. El haja telefonà differentas giadas cun ses giast per discurrer sur da lur experientscha.

Sco brischà en la memoria

Tar la chamona steva in'infurmaziun, ch’i dettia crudada da crappa tar il Piz Cengalo. E quai ha Ervin Jacomet lura era vis davent dal Piz Badile. Ins haja udì la crappa a crudar dal piz giu ed els hajan vis co quai fascheva gronds nivels da pulvra. El haja bain vis bovas andantas, di il guid da muntogna che fa turas sin l’entir mund, ma insatge uschia n'haja el anc mai vesì.

La bova saja sco brischada en sia memoria ed è in'ulteriura experientscha per sia professiun. In tal eveniment averteschia dad esser anc pli precaut e ponderar anc meglier nua ch’ins giaja en las muntognas. Metter la professiun sco guid da muntogna da la vart n’è dentant nagina opziun per Ervin Jacoment.

Legenda: Guardar il video Gia avant la bova crudava crappa giu dal Piz Cengalo. Durada 00:12 minutas.
Or da RTR dals 06.09.2017.